Америкийн шүүх Жоржиа мужийн ахлах сургуульд болсон буудлагын улмаас дөрвөн хүний аминд хүрсэн хэрэгт буруутгагдаж буй өсвөр насны хүүгийн аавыг хүн амины хэрэг, хүүхдийг харгислах болон бусад хэрэгт буруутай гэж үзжээ.
2024 онд Жоржиа мужийн Виндер хотод хоёр багш, хоёр сурагчийн аминд хүрсэн халдлага олон нийтийн анхааралд байна. 55 настай аавыг яллаж байгаа нь АНУ-ын эцэг эх хүүхдийнхээ үйлдсэн буудлагын хэргээр эрүүгийн хариуцлага хүлээсэн гурав дахь тохиолдол юм. Прокурорууд Colin Gray-г 14 настай хүүгийнхээ халдлагыг зогсоох боломжтой цорын ганц хүн гэж үзсэн.
Учир нь тэр хүүгээ "дэлбэрэхээ хүлээж буй бөмбөг" гэдгийг мэдэж байсан гэнэ. Одоогоор түүний хүү Colt Gray шүүх хурлаа хүлээж байна. Шүүх хурлын үеэр шүүгчид Colin Gray халдлагаас нэг жилийн өмнө хүүдээ Зул сарын баяраар "AR" загварын буу авч өгсөн тухай мэдээлсэн. Гэтэл үүнээс ердөө долоон сарын өмнө цагдаа нар сургуульд буудлага үйлдэх онлайн заналхийллийн талаар хүүгээс нь байцаалт авсан байжээ.
Прокурорууд түүнийг "хүүгийнхээ сэтгэцийн байдал муудаж, хүчирхийлэл үйлдэж, сургуульд буудлага хийх шинж тэмдгийг олон удаа харсан. Хүү нь сурагч, багш нарыг хэрхэн алахаар төлөвлөж байгааг дэлгэрэнгүй бичсэн дэвтэр зэрэг олон анхааруулах тэмдэгийг үл тоомсорлосон" гэж буруутгажээ.
Шүүх хуралдаан хоёр долоо хоног үргэлжилсэн ч шүүх бүрэлдэхүүн шийдвэр ердөө хоёр цагт гаргасан. Асар богино хугацаанд хөгширсөн Colin Gray шүүхийн шийдвэрийг сонсоод илт хариу үйлдэл үзүүлээгүй байна. Тэр дор хаяж 30 жилийн хорих ял авах магадлалтай юм. Түүнд хэдий хэмжээний ял оноох сонсгол хараахан товлогдоогүй байна.
Сургуулийн буудлагын хэрэгт сэжигтний эцэг эхэд ял тулгах нь АНУ-д харьцангуй шинэ боловч саяхан хоёр шүүх хуралд энэ тохиолдол бүртгэгдсэн. 2024 оны 4-р сард худалдаж авсан ангийн буугаар нь дөрвөн сурагчийг хөнөөсөн Мичиганы өсвөр насны хүүхдийн эцэг эхэд "халдлагад оролцсон" хэргээр ял оноосон.
Мөн үүнтэй төстэй өөр нэг хүн амины хэрэгт аав ээжийг нь буруутай гэж үзэн 10-15 жилийн хорих ял оноожээ.
Source: Сэтгүүлч Н.Урантогтох
Эх сурвалж: https://www.bbc.com/news/articles/cpv87wwmd0lo